Ground control ....

...to major Tom....


Það er einhver fjárinn að ganga hérna..það kallast gestagangur. Við höfum legið í þessu og AHG líka. Við fengum sem sagt kærkomna heimsókn frá Íslandi í vikunni sem leið og þau fóru með einhverjum brösum heim í gær morgun. Við fórum án Bóndans í Bakken, eða segir maður á Bakken? Þar fóru börnin með frænkunni í hestavagn og flest tívolítæki sem leifðu börn. Ég fæ greitt fyrir að vera gunga í tívolíi, ég er komin með dágóðan sjóð sem ég ætla að nota þegar ég leysi Bóndann úr þessari fáránlegu geimflaug þarna fyrir ofan.

Við fórum líka í Dýragarðinn og tókum þá Bóndann með, enda laugardagur og hann ekki að vinna. Þar var náttúrulega ýmislegt að sjá en það er helst frá því að segja þegar allir nema ég fóru í Tropical húsið,þar sem fiðrildi af erlendu bergi brotin eru geymd. Ég var barnavagnapía. Það var gott að sitja úti en svo (eins og ég hef jú nefnt áður) byrjaði að rigna. Fyrst komu bara nokkrir dropar en ég ákvað að setja til öryggis regnhlíf yfir vagninn hennar Ásdísar þar sem hann var ekki í regnslá. Svo komu fleiri dropar. Ég setti þá eina yfir fram hluta vagnsins og aðra yfir afturhlutann,setti líka eina yfir Sindra vagn sem var að verða gegndrepa. Enn herti rigningu. Ég skipti regnhlífunum út og setti regnstakkinn hennar Vilborgar* (sem Bóndinn fékk lánaðan) yfir vagninn og setti eina regnhlíf yfir mig sjálfa. Enn herðir...ég vissi ekki hvert ég ætlaði.. ég gaf skít í nestispokann sem hafði haft barnaregnhlífina og setti hana yfir hnén á mér og áður nefnd regnhlíf hékk fyrir ofan mig. Ég er viss um að fólkið sem hafðist við í skjóli undir þakskeggi stóru,hafi haldið að ég væri kannski eitthvað sem ætti að vera inni í Tropical húsinu.

Gátan er þessi: Hvað var ég með margar regnhlífar?

Af börnum er bara fínt að frétta.

Sunneva og Gummi byrja í skólunum á morgun og Sindri verður bara heima hjá mér örugglega í mánuð í viðbót. Ég vona að það sé ekki því að kenna að hann kann ekki öll algengustu trix smábarna. Hann vill ekki sýna hvað hann er stór og ekki segja voff fyrir hundinn eða íhíhí fyrir hestinn. Hann kann hinsvegar að herma eftir ýmsum mun áhugaverðari og merkilegri tækjum, svo sem eins og ryksugunni. Hann trillar með hana um alla íbúð og gólar uuuuuuUUUUUUUUUU.

*Vilborg=yfirkona Bóndans

(sagt í þrumum og eldingum)

....hvern langar svosem að drolla allan daginn alla daga úti í steikjandi sól og ofþornun að sleikja ís??...

Nammi og myggur

Það eru myggur hér,svona ofvaxnar mýflugur eða smávaxnar moskítóflugur. Þær eru búnar að bíta Sindra útum allt og hin börnin á ýmsum stöðum. Ótrúlegt en satt hefur Bóndinn alveg sloppið, það er af sem áður var er hann varð flóm að bráð.
Það var allt fullt af þessu hér inni í gærkveldi og um leið og ég vaknaði í morgun æddi ég út í búð og keypti raflostsflugnaspaða, tvo minni spaða (handa börnunum) og flugnaeytur. Svo var okkur sagt að ef við höfum gluggana lokaða í ljósaskiptunum þá komi þær ekki inn,þó svo að opnað verði út seinna um kvöldið.

Það kom svo mikið nammi með frá Íslandi að ég þurfti að endurskipuleggja í skápunum,það er heil hilla full af gotteríi.

Við Sindri fórum og prufuhjóluðum regnkápuna í dag. Það var mjög mikil rigning svo það var upplagt að smella sér. Hann sat í sínu sæti á bögglaberanum. Niðurstaða þessarar regnkápu prufu er að kápan er í alla staði ágæt. Ég verð bara að finna uppá einhverju til að brúa bilið milli framhandleggs og handarbaks, rétt aðeins of stutt þegar ég hjóla. Það er spurning hvort ég reyni ekki að sauma bara á ermarnar einhverja framlengingu. Þegar ég er búin að því get ég sent myndir af því til 66°norður og þeir munu senda mér allar kápurnar sínar og fullt af peningum fyrir að breyta þeim öllum..eða þeir gætu nú líka hlíft mér við að sauma það á sjálf, þeir geta keypt höfundaréttinn af þessari verðandi snilldarhugmynd. Jamm, ég mun græða á tá og fingri, þó ekki eins mikið og af hinu gróðaplaninu mínu sem er að ég og Dísa skvísa förum á Strikið og spilum fyrir landann (þá meina ég Íslendinga,það eru eiginlega ekki aðrir á Strikinu að versla..). Landinn mun þá henda í okkur fé sínu. ÉG tala nú ekki um hversu hræður hann verður yfir undurfögrum hljóðum úr okkar ágætu rörum.
Hér er svo allt gott. Verð að segja að það er betra að vera sólbrenndur í rigningu en í meiri sól...vúff.
Bryndís og co koma í fyrramálið og verður þeim boðið í morgunkaffi áður en þau leggja íann aftur, hlökkum til :)

Afmæli í röðum

Sjálf á ég afmæli í dag.

Eins og er kunn staðreynd þá varð ég ekki hrukkótt eða hokin eða neitt af því sem ég taldi upp að Bóndinn væri enda er ég ennþá bara tuttugu og eitthvað.

Ein saga í tilefni aldursbreytinga:

Ónefndur sveitarstjóri búsettur á Hvammstanga hringdi í mig þegar ég bjó líka þar (þá árinu yngri en ég er nú). Ég svaraði með hallói en hann sagði "já...er mamma þín heima".....

Það á enginn eftir að taka eftir því þegar ég verð gömul.

Myndir

Hér er smá dokjúment að ég hafi náð að setja fléttu á hárið á Sunnevu, meira að segja hálfa fastafléttu. Fléttur fengu meira að segja að vera yfir nóttina.

Afmælisbarnið 15.júlí

Krakkarnir föndruðu kort handa Bóndanum, það fór ótakmarkað magn af pínulitlum stjörnum á gólfið...hér er allt glimrandi...

Og um kvöldið spiluðum við kana við þau úr AHG. Það var dejligt, enda var heitt á svölunum allt kvöldið. Ég er ekki feimin við að segja frá því að ég vann.

Afmæli

Þorvaldur varð 30 ára í dag.
Það sást strax á honum, hann varð allur hokinn og þreyttur, hrukkóttur og niðurdreginn. Ættingjar og vinir sem hringdu sýndu honum reyndar mikla samúð.
Ég segi samt til hamingju með áfangann, við á búinu gáfum honum línuskauta til lukku.

Myndir bráðum :)

Enn af veðri

Það getur verið að Kaupmannahefningar skuldi mér að þeir leggist á skeljarnar og kyssi á mér tærnar því alveg síðan regnkápan mín fína, sem bæ ðe vei er komin, var keypt þá hefur bara ekki rignt.
Ég er nú reyndar alveg hætt að vera hissa á því og sá þetta gerast, alltaf þegar ég kýs að hengja upp þvott þá rignir. Það er súr staðreynd og ég held að þetta sé ættgengur fjandi.

Héðan er hinsvegar allt gott að frétta. Ég er enn heimavinnandi og held ég geti sagt að ég sé líka húsmóðir, allavega er jólakaka í ofninum.

Bóndinn er að vinna hjá konunni ennþá við málningar. Vinnutíminn er alveg svakalegur, maður skilur ekkert í þessu, ætla mætti að keyra eigi okkur út strax í fyrstu viku. Hann þarf alveg að mæta kl 10 og er ekki búinn fyrr en kl 15...maður spyr sig hvort þetta eigi nokkuð eftir að ganga upp... hvort ekki eigi eftir að koma upp veruleg álagsmeiðsl...ÞÁ Í LETINA.
Voðalega slakir blessaðir danirnir.

Rafastugl

Hvernig varetta:

Saltkarl
Rasskjöt
Brennt frúns
Frottblutningur
Hágat

Verðlaun fyrir þann sem getur raðað þessu rétt saman. Bryndís og Hinrik mega ekki keppa :)

Veðurteppi

Það er rigning ennþá. Maður spyr sig hvort að það sé yfir leitt ekki rigning og rok á Ísland heldur bara þar sem við erum? Nei nei, enga svartsýni hér. Þetta er í lagi fyrst ég er búin að fá rífandi viðbrögð við bauli mínu yfir regnfataleysi og er nú á leiðinni til mín dýryndis (dírindis,dýrindis,díryndis,bryndís) regnkápa frá 66 gráðum norður. Hrópa húrra fyrir því að eiga bæði systur og regnkápu.
Í morgun kom til mín kona að nafni Fransizka til að stilla píanóið fagra. Hvernig haldiði að Fransizkur líti út? Fyrir mér, áður en ég sá hana, þegar ég var búin að heyra í henni í síma, var hún suðræn í útliti, dökkhærð með svakalega sítt hár. Hún var í andlegu jafnvægi vel lyktandi og var píanóleikari og bara um 35 ára og bar með sér þvílíkan þokka að jafnvel gól á borð við einmitt það þegar verið er að stilla falskt hljóðfæri og ýta á sömu nótuna aftur og aftur myndi hverfa eins og dögg fyrir sólu. Ég sá fyrir mér að hún væri sönn ævintýra manneskja.
Það var ekkert af ofantöldu sem mætti hér kl 9:30 í morgun...að vísu mjög fín manneskja örugglega, en hún var lítil, ljóshærð með stutthár,í bláum útihúsabuxum greiddar ofan í sokkana og æpandi gulum jakka með rauða skólatösku. Hún var með gular tennur og tileygð. En hún var hress og stillti píanóið svo nú get ég byrjað að vekja nágrannana með einhverju velvöldu frá mínum eigins fingrum. Við börnin þurftum að vísu að vera úti á meðan, hún þurfti jú að hafa næði. Þannig að við stóðum bara í rigningunni í klukkutíma..hálf blautt svona..

Rigningin

Það bara rignir endalaust. Hvað á það að þíða?? Bóndinn er farinn að vinna hjá konu (nei ekki svoleiðis..). Hann er að mála hjá henni veggina og líma eitthvað. Á meðan sit ég heima og passa börn, eða glápi á rigningu. Það er nefnilega þannig að mig vantar regnkápu, já, kápu, sem er síð niðrá hné eða svo. Hana er ekki að finna hér í Köben. Án hennar kemst ég ekkert út þegar rignir svona. Ég er búin að þræða Strikið, Fiskitorvet og Fields en allir eru að selja ermalausa boli. Svo kæra fjölskylda og þið sem tilheyrið almúganum endilega bendið mér á hvar ég fæ regnkápu. Ef þið vitið um í Köben þá er það glimrandi en ég hugsa að ég þurfi að leita heim til Íslands, þar sem er jú rok og rigning nema í síðustu viku :). Og þið verðið að kommenta eða senda okkur tölvupóst eða sms eða eitthvað, skrifiði bréf, það er alltaf svo skemmtilegt. Love you all.

(af símamálum)

Ég hlít að vera orðin merkisborgari Kaupmannahafnar, allavega fékk ég senda ávísun í pósti frá vinum mínum í TDC (þeim sem eru svona mikið í bjórnum). Jámm, eftir að hafa verið rukkuð fyrst um 2500dkk og svo 1400dkk fékk ég reikning uppá 49dkk og ávísun uppá 495dkk.
Það er meira hvað það er billigt að búa í Köben, allir að koma.. það er víst þannig að það streyma bara peningar innum lúguna hjá fólki.

Nýja torg og garður Kóngsins

Ég hef verið að velta fyrir mér Kongens nytorv og þá aðallega afhverju Kóngurinn hefur þurft nýtt torg. Varð hitt of lítið, of púkó, skemmdist það...
Við fórum hinsvegar í garð kóngsins. Rosenborg have að mig minnir að garðurinn heiti. Í honum er þetta tré sem er hér fyrir ofan. Krakkarnir eru þar undir, eins og maurar að stærð.

Og ég var þarna líka. Fólk hefur mögulega haldið að fjölskyldan hefði verið að fara í garðinn með rugluðu frænku sína, allavega af myndinni að dæma.

Og við fórum svo í Botaniske have. Alger garðadagur. Það gæti verið að Sunneva sé frá Egyptalandi af stellingunni að dæma...

Og eitt það undarlegasta. Það lá svartur snákur í grasinu alveg upp við gangstíginn. Það verður nú að teljast hálf furðulegt ekki satt? Hann var alveg eins og dauður, en það ku vera taktík þeirra við að veiða. Sunneva sem vílar til dæmis ekki fyrir sér að þamba grillvökva var ekki sein á sér að pota í fyrirbærið...hún er ótrúleg.

Svo um daginn voru varðeldar um allt. Man ekki útaf hverju en það var eitthvað. Við þangað í kvöldsólinni, bara hreint ágætt. Krakkarnir fengu útrás það var líka fínt. Kaupa þau orku einhversstaðar? Hafið þið verið að lauma þessu til þeirra?


Ég fengi trúlega ekki einusinni einkunn fyrir þessa uppsetningu enda dugði þetta ekkert, skíta taubleiur..hverjum datt þetta eiginlega í hug??